З Днём Незалежнасці Рэспублікі Беларусь! Віншаванне рэктара Беларускага дзяржаўнага медыцынскага ўніверсітэта

Паважаныя калегі!

Віншую вас з галоўным святам нашай краіны – Днём Незалежнасці Рэспублікі Беларусь. Дзень Рэспублікі – гэта ўрачыстасць для ўсіх, хто шануе мінулае сваёй Айчыны, ганарыцца ёю, хто ўносіць штодзённы ўклад у развіццё беларускай дзяржавы.

Адзначаючы Дзень Незалежнасці Рэспублікі Беларусь ў Год гістарычнай памяці, мы праслаўляем герояў-землякоў, якія пераадолелі жудасныя цяжкасці вайны дзеля вызвалення роднай зямлі. Дзякуючы іх самаадданасці, мужнасці і патрыятызму беларусы атрымалі права жыць пад мірным небам. Вызваліцелі далі нам самае каштоўнае, што чалавек мае, – жыццё і свабоду.

Менавіта таму галоўнае свята беларускай дзяржавы звязана з афіцыйнай датай вызвалення яе ад нямецка-фашысцкіх захопнікаў і з’яўляецца сімвалам доблесці нашага народа, які змог не толькі перамагчы бязлітаснага ворага, але і затым адрадзіць краіну, ператварыць яе ў сучасную незалежную дзяржаву.

Наш святы абавязак шанаваць самаадданасць пакалення пераможцаў, захоўваць і павялічыць яго заваёвы, умацоўваць нацыянальную бяспеку і суверэнітэт Рэспублікі Беларусь. Мы павінны берагчы памяць пра вялікі подзвіг, перадаваць яе будучым пакаленням, умацоўваць мір на сваёй зямлі, стваральнай працай рабіць яе багацейшай і прыгажэйшай.

Прыміце самыя шчырыя пажаданні добрага здароўя, невычэрпнай энергіі, шчасця, дабрабыту, узаемаразумення, згоды, стабільнасці і поспехаў у працы ў імя любімай Радзімы! Няхай кожны дзень вашага жыцця будзе напоўнены радасцю, цяплом і новымі дасягненнямі!

Член-карэспандэнт Нацыянальнай академіі навук Беларусі, доктар медыцынскіх навук, прафесар
Сяргей Пятровіч Рубніковіч